Act 9 | TVK | STEP | E melele nen tak, Sol di misa sepinien xil xa nggeih bit ihas vuol ni moletin xil xa laneket e Iesu. Misak ni, be visal Vatixar na pris xil

Acts 9

Sol Bemei Mineket e Iesu

1 E melele nen tak, Sol di misa sepinien xil xa nggeih bit ihas vuol ni moletin xil xa laneket e Iesu. Misak ni, be visal Vatixar na pris xil 2 e misisi tengan vatis uvei xil xa vasep kil polien nan mi vat xil te nim te pispisien xil xa ladi e Damaskas. Ma xi misa uvei xil ak xa mae ni xa melele xa ikamet tiramue mu atou tei xa di laneket e Iesu, ikila ital xati e ihuri imei mun e Serusalem.

3 Melele xa Sol di bemei sangas e taon tahal Damaskas, vatakes, miehen tei xa minehin pupu nggo ut nesao e mei mileluv xole, 4 e xi mot be tan. Di, milong rae tei xa biteni mini bitene, “Sol! Sol! ?Veneh ma di osak purun nou del moletin navan xil mak?”

5 E Sol biteni mini bit, “?Suv, xouk visi?”

E rae ak biteni mini bit, “Inou Iesu, ngan xa di osak purun ni. 6 E umea e uhe taon xai tahal Damaskas. E rute ak iaxa lihit naha xa upol ni.”

7 Moletin xil xa laba del xat Sol, lalong rae ak e latapus ti moletin. Uli mikan e ladit votei tang. 8 Melele xa Sol mitamea ra tan e miketeh, misakras vapus neta tova. Ma xil lateli e hen e ladeli be Damaskas. 9 Melengien tol Sol dat mak, taketeh ti, e bit naxanien ti e namu ti neta.

10 E taon tahal Damaskas, moletin tei xa mineket da en, hisen Ananaeas. E Suv Iesu misepin mini nggo metuveen tei e biteni mini, bitene, “!Ananaeas!”

E xi bit rilomun ni bit, “Inou xiak Suv.”

11 Ma Suv biteni mini bit, “Uvue xatuk e uha uhusil suse xa lakesi ni 'Suse xa Momal'. E tim sa Sudas, usis ves moletin tei tahal Tarsis, hisen Sol. Xi di misis. 12 E metuveen tei, tepus moletin tei hisen Ananaeas xa bemei miling hen en tengan vaketeh rilomun.”

13 Ananaeas bit rilomun ni mini bit, “Suv, moletin holu di lasep usil moletin ak ve holesok holu xa misa xa di pol ni mi moletin eo nam xil e Serusalem. 14 E taxeak bemei inggak, e nggur xeihen nggo Vatixar na pris xil tengan mei ital xat moletin xil vus xa di lamot minuk.”

15 E Suv biteni mini bit, “Ha pusi, vengan inou nabosei ngamu tengan ipol minou. Xi isep usil hisok mi ngan xil xa latave Siu ti, mi suv toto xil, e mi mol-Isrel xil mun. 16 E inou iaxa nipisen hisit longpangasien xil mini xa ihuri ve hisok.”

17 Ma Ananaeas ba, be nim xa Sol da en, miling hen en e biteni mini bit, “Tua Sol, Suv Iesu xa testal minuk e suse melele xa di omei inggak, xi vari iaxa misil nou. Xi misil nou namei tengan xouk okila uketeh rilomun e mei upolu ni Ninin Eo.” 18 Vatakes, neta tei xa nggoni kahbe meseo mot reling meten, ma xi miketeh rilomun. Di, mitamea misoh, e Ananaeas derir ni e oei. 19 E dutou ni ngan xa ngganien bus, ven mei nggeih rilomun.

Sol Misetu e Damaskas

Sol da melengien vahis mun e Damaskas del moletin xil xa laneket e Iesu. 20 Xi mika mal be nim te pispisien xil na Siu xil e di misetu xa Iesu be Nat Hi reitin.

21 Xil vus xa lalong sepinien nan latemanin, ma di lasis xil mun tang labit, “?Tave xi ti iaxa di tehas vin moletin na Iesu xil e Serusalem? Malonge bemei inggak tengan vatal xat ngan xil xa langgusil Iesu e valeh xil lava mun visal vat xil na pris xil. ?Midep?”

22 E setutuen na Sol mei nggeih pilei sung e pisen ni momal xa Iesu iaxa be Kristo xa Hi tehosei tengan vamei. Misak ni Siu xil xa ladi Damaskas lasakras lavit rilomun ni sepinien tova vaha mini.

23 Melengien hao mei mitavi, rut Siu xil mei ladotan vituei e lapol ni lingxatien tei tengan lihas vin Sol. 24 Melengien e vongien xil ngasen di laketeh xol puiteh te vioh xa mikapis xol taon ak tengan livulu xati e lihas vini. E Sol milongeong ni lingxatien nae. 25 Ma e vongien tei, ngan xil xa laneket nggo pispisien nan lasoson ni de ateli tei xa eilep xa lasar xat ao da en. Di, laso kital ni nggo mesekital tei xa de nesao e seri vioh ak, e lasae ni be tan. Ma di, Sol milesae ba.

Sol Dilomun Be Serusalem

26 Sol dilomun be Serusalem e misak tengan mei vamos e ngan xil xa laneket e Iesu. E xil vus uli mikan ni e latake reitin ti en melele xa xi biteni mi xil bit be tei e xil. 27 Di, tei e xil xa laneket, hisen Banabas, bemei mini e dela lube visal eloheoh xil na Iesu. Xi dap lelen kuhi sung mi xil xa Sol tepus Suv e suse e Suv tesepin mini tetep. Xi biteni mun mi xil bit Sol ulin takan ti melele xa di tesetu usil his Iesu e Damaskas. 28 Ma lamae ni Sol mos e xil, e di mikapis e ut xil ngasen e Serusalem e di misetu usil his Iesu del xeihen. 29 Di misepin mun e di mingor del Siu xil xa lasepin ni sepinien tahal Kris. Ma xil di lalang ves suse tova xa lihasi imat ixo en. 30 E melele xa ngan xil xa laneket lalongeong ni, xil ladela labe taon tahal Sesaria. E rute ak, xil lasa ni nggo tuturil tei be taon tahal Tarsis.

31 Dutou ni ngan ak, ngan xil te Sias na Iesu xa ladi e provins xil tahal Sudea, Kaleli e Sameria, xil di lateti e tomat. Xil mei latemerere kuhi ni Suv Iesu, e tetel tutouen na Ninin Eo neketen nae temei te xeih pilei sung e moletin holu mei latemos e xil.

Pita Pol ni Le Aeneas Bos Rilomun

32 Pita, xa be tei e eloheoh xil na Iesu, di tekapis e ut xil ngasen. E vatei, ba misao ni moletin eo xil na Hi xa ladi e taon tahal Lita. 33 E rute ak, xi pus moletin tei xa rin tei mat, hisen Aeneas. Huram tol e he sav (8) xi takakao ti, e pat dat rong mak tang. 34 Pita biteni mini bit, “Aeneas, Iesu Kristo pol ni vem bos ngamu. !Utamea, e uvulun suon mam!” Vatakes, Aeneas mitamea misoh. 35 Moletin xil vus xa ladi e taon tahal Lita e rute sav mun xa ladi ut xa lakesi ni 'Saron' lapusi mak, ma labiles meulien nae e laneket e Suv Iesu.

Pita Dal Rat Dorkas ra Maten

36 E taon tahal Sopa, atou tei da en xa neketen nan nggeih e Iesu, hisen Tapita. E moletin xil lakesi ni ni hisen tei mun xa nggo sepinien tahal Kris labit 'Dorkas'. ^{▼▼9:36 Siu holu latehur his lu mu tol, tei e Arameak na Siu xil, e tei mun e sepinien Krik tahal Kris. Hisen Tapita e Dorkas, koute teni be 'deer'.} E meulien nan, xi di tepol ni polien tehos xil e di tetutou ni moletin xil xa lathe hoeo. 37 E melele xa Pita da tamu e rute ak, atou ak nggur meseien tei, ma mat. Atou xil lakas moten tiei nan memese tengan ha litihin ni. Di, lalingi pat e von toen xa be lu nen nesao e nim man. 38 Taon ak tahal Sopa tave sotin ti ra taon tahal Lita. Ma melele xa moletin xil tahal Sopa xa laneket lalongeong ni xa Pita dat Lita, lasil tiramue lu lube visali del xat sepinien ak, “!Utemanon li, umei visal xamem!” 39 Ma vatakes, Pita bue xat xi e be xatel latoba. Melele xa latduxoh tim sa Dorkas, xil ladela be von paten nan xa de nesao e nim man. E rute ak, tunau xil xa lateti mei lakereli xol Pita. Di ladang e lapisen ni mini eising xil xa Dorkas tetili melele xa temeul tamu teta. 40 Ma di, Pita misil rerat xil lastal ra von toen ak e mitingeiril misis. Di, biles pus tiei na Dorkas e biteni bit, “!Tapita, tamea!” Ma xi miketeh. E melele xa pus Pita, mitamea dotan. 41 Di, Pita dal xat hen e dal rati misoh. Bus, mikes ngan xil xa laneket del tunau xil e pisen Dorkas mi xil xa meul rilomun. 42 Longeongen usili ba mikapis e ut xil ngasen e Sopa. Ma moletin holu mei laneket e Suv Iesu. 43 Pita de visal xil e Sopa nousav vuteili e e nim ma Saemon xa di pol ni holesok xil ni hilbe buluk. ^{▼▼9:43 leather}